Arestado sa Mulanay, Quezon Province ang isang 30-anyos na lalaki na kabilang sa Most Wanted Persons ng Philippine National Police (PNP) kaugnay ng pagpatay kay PSMS Zaldy Castillo Dela Peña, isang pulis na nakatalaga sa Quirino Police Provincial Office (QPPO). Nadakip ang suspek na kinilalang alyas “Sandia” dakong 3:00 ng hapon noong Nobyembre 8, 2026, sa bisa ng warrant of arrest para sa kasong homicide.
Pinangunahan ng tracker team ng 1st Quirino Provincial Mobile Force Company ang operasyon, katuwang ang iba pang yunit ng QPPO at Police Regional Office CALABARZON (PRO4A). Matapos ang matagumpay na operasyon, dinala ang suspek sa Cabarroguis Police Station para sa kaukulang dokumentasyon at legal na proseso.
Nag-ugat ang kaso sa pananaksak kay PSMS Dela Peña, 42 taong gulang, dakong alas-11:00 ng gabi noong Hulyo 31, 2026, sa isang sari-sari store sa Brgy. San Marcos, Cabarroguis, Quirino. Batay sa imbestigasyon, nagkaroon umano ng kaguluhan matapos pagsabihan ng may-ari ng tindahan ang dalawang lalaki na hinaan ang kanilang boses dahil gabi na at lampas na sa curfew hours.
Nang subukan umanong awatin ni PSMS Dela Peña ang mga ito, bumunot umano ng kutsilyo si alyas “Sandia” at sinaksak ang pulis sa kaliwang bahagi ng katawan, malapit sa tagiliran. Agad siyang isinugod sa Quirino Provincial Medical Center ngunit idineklarang dead on arrival dahil sa matinding pagkawala ng dugo na nagdulot ng hypovolemic shock.
Pinuri ni PBGen Mariano C. Rodriguez, Regional Director ng PRO2, ang kapulisan sa kanilang hindi matitinag na dedikasyon at pakikipagtulungan sa iba pang yunit ng PNP upang matiyak na maihahatid sa hustisya ang mga responsable sa krimen.
Ang pagkakaaresto sa suspek ay sumasalamin sa patuloy na pagsisikap ng PNP na panagutin ang mga pinaghihinalaang lumalabag sa batas at tiyaking naipatutupad ang mga legal na proseso nang walang kinikilingan. Kaakibat nito ang paninindigan ng organisasyon na pangalagaan ang kapayapaan at kaayusan at isulong ang adhikain ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO2 (https://www.facebook.com/share/p/1DyhxznhZq/)
