Nasabat ng Philippine National Police (PNP), sa pakikipagtulungan ng Mines and Geosciences Bureau (MGB) Region 10, ang tinatayang Php45 milyong halaga ng heavy equipment, habang arestado ang anim na indibidwal, at na-rescue ang isang menor de edad sa isinagawang operasyon laban sa pinaghihinalaang ilegal na pagmimina sa Sitio Pin-as, Brgy. Tuburan, Cagayan de Oro City, bandang 4:00 ng madaling-araw noong Nobyembre 6, 2026.
Kabilang sa mga operasyon ang mga miyembro mula sa Regional Mobile Force Battalion 10 (RMFB 10), Regional Intelligence Division 10 (RID10), at Cagayan de Oro Police Station 8, na nagbigay ng tulong panseguridad sa MGB sa pagpapatupad ng Republic Act No. 7942 o ang Philippine Mining Act of 1995, at ang umiiral na moratorium sa mga gawain sa pagmimina sa mga natukoy na lugar sa Opol, Misamis Oriental, at sa kahabaan ng Iponan River.
Ang anim na naarestong indibidwal, na may edad 18 hanggang 43, ay mga residente ng Agusan del Sur, Davao de Oro, Davao City, Surigao del Norte, Surigao City, at Dinagat Islands.
Nasamsam ng mga awtoridad ang 12 excavator, tatlong dump truck, dalawang trommel, dalawang tow truck, dalawang generator, at isang crawler truck, na may kabuuang tinatayang halaga na Php45 milyon.
Lumalabas sa paunang imbestigasyon na ang pinaghihinalaang ilegal na pagmimina ay isinasagawa sa ilalim ng pagpapanggap bilang isang operasyon ng quarrying, at itinuturong pinopondohan ng isang Chinese national.
Binigyang-diin ni PBGen Nestor C Babagay Jr., Regional Director ng PRO10, ang kahalagahan ng patuloy na pagtutulungan ng iba’t ibang ahensya upang masugpo ang mga ilegal na gawaing nagbabanta sa kapaligiran at likas na yaman.
“We will continue to work closely with the Mines and Geosciences Bureau and other concerned government agencies to ensure that activities involving our natural resources are conducted within the bounds of the law. Illegal mining will not be tolerated, especially when it threatens our environment, waterways, and the safety and welfare of our communities” (Patuloy kaming makikipagtulungan nang malapitan sa Mines and Geosciences Bureau at sa iba pang kaugnay na ahensya ng pamahalaan upang matiyak na ang mga aktibidad na may kaugnayan sa ating likas na yaman ay isinasagawa ayon sa isinasaad ng batas. Hindi namin kakunsintihin ang illegal mining, lalo na kapag nagbabanta ito sa ating kapaligiran, mga daluyan ng tubig, at sa kaligtasan at kapakanan ng ating mga komunidad), pahayag ni RD Babagay.
Source: https://www.facebook.com/share/p/1E3rdsssKm/
