Nasa Full Alert Status na ang Philippine National Police (PNP) simula alas-12:01 ng madaling-araw ng Oktubre 30 hanggang alas-12:01 ng madaling-araw ng Nobyembre 3, 2026, bilang bahagi ng pinaigting na paghahanda para sa Undas 2026. Sa pangunguna ni Police General Jose Melencio C. Nartatez Jr., PNP Chief, nakahanda rin ang mahigit 141,000 tauhan ng kapulisan, mga kawani ng pamahalaan, at force multipliers sa buong bansa upang tiyakin ang kaligtasan ng publiko at mapanatili ang kaayusan sa panahon ng holiday rush.
Binubuo ang deployment ng 73,034 tauhan ng PNP, 16,560 kawani mula sa iba pang ahensya ng pamahalaan, at 51,578 force multipliers. Itatalaga sila sa 5,311 sementeryo at columbaria, gayundin sa mga pangunahing lansangan, transport terminals, lugar-sambahan, pasyalan, at iba pang estratehikong lugar upang magbigay ng seguridad, tumulong sa pamamahala ng trapiko, at umalalay sa mga mamamayan.
Inaasahang sisikip ang daloy ng trapiko dahil sa pagdagsa ng mga biyahero, kabilang ang mga pamilyang uuwi sa kani-kanilang probinsya at mga biyaheng patungo sa iba’t ibang destinasyon bilang paghahanda sa paggunita ng All Saints’ Day at All Souls’ Day sa Nobyembre 1 at 2. Naitala noong nakaraang taon ang 14,014,970 dumalaw sa mga sementeryo sa buong bansa, na nagpapakita ng laki ng inaasahang pagdagsa ng publiko ngayong Undas.
Hinimok ni PGen Nartatez ang mga biyahero na planuhin nang maaga ang kanilang biyahe, umalis nang mas maaga kung maaari, at alamin ang lagay ng trapiko bago bumiyahe. Pinayuhan din niya ang publiko na manatiling mapagmatyag, ingatan ang kanilang mga personal na gamit, bantayan ang mga bata at nakatatandang kasama, at agad humingi ng tulong sa mga pulis kung kinakailangan.
Bahagi ng paghahanda ang patuloy na pagpapatupad ng PNP Focused Agenda, partikular ang Enhanced Managing Police Operations (EMPO), sa pakikipagtulungan sa mga ahensya ng pamahalaan, lokal na pamahalaan, at mga force multiplier. Layunin nitong matiyak ang maayos na koordinasyon at maagap na pagtugon sa mga posibleng insidente at pangangailangan ng publiko sa buong panahon ng Undas.
Sa pamamagitan ng malawakang deployment, pinaigting na kahandaan, at pakikipagtulungan sa komunidad, nananatiling nakatuon ang PNP sa pagbibigay ng ligtas at maayos na paggunita ng Undas 2026, alinsunod sa adhikain ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PNP-PIO (https://www.facebook.com/share/p/1Dnb9opgnx/?mibextid=wwXIfr)
