Malugod na tinanggap ni PBGen Noel B. Vallo, Regional Director ng Police Regional Office Cordillera Administrative Region (PRO CAR), ang 45 kadete ng Philippine National Police Academy (PNPA) sa kanilang courtesy call sa PRO CAR Log Cabin, Camp Major Bado Dangwa, La Trinidad, Benguet noong Oktubre 23, 2026. Layunin ng pagbisita na isulong ang PNPA Cadet Admission Test (CAT) at hikayatin ang mga Cordilleran na tahakin ang karera sa paglilingkod-bayan sa pamamagitan ng Philippine National Police (PNP).
Pinangunahan nina PLtCol Jerold Jake C. Manguerra, Chief Examiner, at PMaj Jay Paul A Andal ang delegasyon na nagtungo sa PRO CAR upang pangasiwaan ang mga kaugnay na aktibidad para sa PNPA CAT at ipakilala sa mga kabataan ang oportunidad na maging bahagi ng susunod na henerasyon ng mga opisyal ng pulisya.
Sa kanyang mensahe, hinimok ni PBGen Vallo ang mga kadete na panindigan ang mataas na pamantayan ng integridad, disiplina, at pananagutan bilang paghahanda sa kanilang magiging tungkulin bilang mga lider ng PNP. Aniya, “Bilang mga magiging lider ng Philippine National Police, mahalagang matutunan ninyo ngayon pa lamang na ang awtoridad ay may kaakibat na pananagutan. Panindigan ninyo ang tama kahit walang nakatingin. Igalang ang batas at ang karapatan ng bawat tao. Huwag hayaang manaig ang pansariling interes sa inyong tungkulin. Tandaan ninyo na ang tiwala ng publiko ay pinaghihirapan at pinangangalagaan sa pamamagitan ng inyong mga kilos at desisyon.”
Samantala, pinangunahan ni PBGen Julio S. Lizardo, Deputy Regional Director for Administration, ang open forum at palitan ng mga pananaw kasama ang mga kadete at kapwa Lakans. Naging pagkakataon ito upang maibahagi ang mga karanasan at mahahalagang aral tungkol sa buhay-kadete at sa mga responsibilidad na kaakibat ng pagiging pulis. Dumalo rin sina PCol Froiland B. Lopez, Deputy Regional Director for Operations; PCol Arnold D. Razote, Acting Chief Regional Staff; at iba pang opisyal at tauhan ng PRO CAR.
Patuloy na sinusuportahan ng PRO CAR ang paghubog sa mga kabataang nagnanais maglingkod sa bayan sa pamamagitan ng pagtataguyod ng integridad, disiplina, at pananagutan sa hanay ng mga magiging opisyal ng pulisya, alinsunod sa adhikain ng Pambansang Pulisya na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO CAR (https://www.facebook.com/share/p/14tqeyBbpnM/)
