Arestado ng Criminal Investigation and Detection Group (CIDG) ang limang indibidwal na umano’y sangkot sa ilegal na pagbebenta at pagbiyahe ng mga baril sa magkahiwalay na operasyon sa Pangasinan noong Agosto 12 at 14, 2026. Nasamsam din ng mga operatiba ang dalawang hindi lisensyadong baril—isang caliber .45 at isang caliber 9 mm pistol.
Batay sa ulat na natanggap ni PMGen Robert AA Morico II, Director ng CIDG, nagsagawa ang Satellite Tracker Team 1 (SATT 1) ng CIDG Pangasinan Provincial Field Unit, katuwang ang mga territorial police units, ng buy-bust operation dakong alas-4:00 ng hapon noong Agosto 12 sa Barangay Baybay Norte, Sual, Pangasinan. Naaresto rito ang isang lalaking suspek na kinilala sa alyas na “Lio” habang umano’y nagbebenta ng isang caliber 9 mm pistol nang walang kaukulang lisensya o permit.
Sa follow-up buy-bust operation noong Agosto 14 sa Barangay Samat, Bugallon, Pangasinan, naaresto naman ang apat na umano’y kasamahan ni “Lio.” Nahuli ang mga ito habang umano’y nagbebenta at nakikipagtransaksyon para sa isang caliber .45 pistol na wala ring kinakailangang lisensya o permit.
Alinsunod sa OPLAN PAGLALANSAG OMEGA at sa programa ni PNP Chief PGen Jose Melencio C. Nartatez Jr. laban sa loose firearms, tiniyak ng CIDG ang patuloy na pagpapatupad ng batas laban sa illegal possession, gunrunning, at gun-for-hire syndicates sa buong bansa, alinsunod sa paninindigang isulong ang “Bagong PNP para sa Bagong Pilipinas: Serbisyong Mabilis, Tapat, at Nararamdaman,” tungo sa mas ligtas at mapayapang pamayanan.
Source: PNP CIDG (https://www.facebook.com/share/p/19HLmTwdBB/)
