Pormal na binuksan ng Police Regional Office Negros Island Region (PRO NIR) ang Criminal Investigation Course (CIC) Class 02-021-NIR-2026-039 sa Regional Investigation Training Center (RITC), Camp Alfredo M. Montelibano Sr., Brgy. Estefania, Bacolod City, noong Agosto 4, 2026. Layunin ng pagsasanay na higit pang palakasin ang kaalaman, kasanayan, at kahandaan ng mga pulis sa pagsasagawa ng mas episyente, makatarungan, at makabagong imbestigasyon.
Pinangunahan ang pagbubukas ng programa nina PCol Lito E. Patay, Deputy Regional Director for Operations; at PCol Sandy S. Vales, Chief, Regional Investigation and Detective Management Division, kasama ang iba pang opisyal ng PRO NIR. Ang kanilang presensya ay nagpapakita ng matibay na suporta ng pamunuan sa patuloy na propesyonalisasyon at pagpapaunlad ng kakayahan ng bawat miyembro ng Philippine National Police.
Nasa kabuuang 55 kalahok mula sa iba’t ibang yunit ng Philippine National Police (PNP), Philippine Army (PA), at Bureau of Jail Management and Penology (BJMP) ang lumahok sa pagsasanay. Ipinakikita nito ang matatag na pagtutulungan ng mga law enforcement at security agencies sa pagpapalakas ng kakayahan sa imbestigasyon.
Sa kanyang mensahe, binigyang-diin ni PBGen Romano V. Cardiño, Regional Director, ang mahalagang papel ng mga imbestigador na may mataas na antas ng kakayahan at integridad sa pagpapatupad ng batas. Hinikayat niya ang mga kalahok na paghusayin pa ang kanilang kaalaman at kasanayan habang isinasabuhay ang katapatan, propesyonalismo, katotohanan, at katarungan sa bawat tungkulin.
Bahagi ang Criminal Investigation Course ng patuloy na programa ng PRO NIR sa pagpapaunlad ng kakayahan ng mga tauhan upang matiyak ang masusing, legal, at ebidensyang nakabatay na pag-iimbestiga. Sa pamamagitan ng mga ganitong pagsasanay, patuloy na isinusulong ng PRO NIR ang adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman,” tungo sa mas mahusay na serbisyo at mas ligtas na pamayanan.
Panulat ni Pat Andrea Dominique Depalubos
Source: PRO NIR https://www.facebook.com/share/p/1LVmir3iBG/
