Dalawang indibidwal ang naaresto habang iba’t ibang uri ng mga ilegal na baril, bala, at iba pang kaugnay na ebidensya ang nakumpiska sa dalawang magkahiwalay na operasyon sa pagpapatupad ng search warrants ng Cagayan Police Provincial Office laban sa mga lumabag sa Republic Act No. 10591 o ang Comprehensive Firearms and Ammunition Regulation Act sa bayan ng Tuao, Cagayan noong Hulyo 27, 2026.
Pinangunahan ng mga operatiba ng Provincial Intelligence Unit–Provincial Drug Enforcement Unit (PIU-PDEU), sa pamumuno ni PLtCol Noriel U. Lacangan, Chief, PIU, bilang lead unit, ang magkahiwalay na operasyon katuwang ang mga tauhan ng Tuao Police Station sa pamumuno ni PMaj Jeorge V. Jacob, Officer-in-Charge, at ng 1st Cagayan Provincial Mobile Force Company (CPMFC), 4th Platoon.
Sa unang operasyon, ipinatupad ang search warrant laban kay alyas “Domeng,” 63 taong gulang at may asawa. Kusang isinuko ng suspek ang isang .38 caliber revolver (Shooters Arms) na walang serial number at isang .357 Magnum revolver na may serial number at holster. Nakumpiska rin ang isang 12-gauge shotgun (Shooter) na may serial number, isang 12-gauge homemade shotgun, labintatlong bala ng 12-gauge shotgun, apat na bala ng .357 Magnum, isang sling bag, isang sako, at isang foot sack, na naging dahilan ng kanyang pagkakaaresto.
Samantala, sa ikalawang operasyon, ipinatupad ang search warrant laban kay alyas “Nestor,” 34 taong gulang at may asawa, na nagresulta sa pagkakasamsam ng tatlong bala ng caliber 9mm at isang kulay brown na sling bag, na naging dahilan din ng kanyang pagkakaaresto.
Dinala ang dalawang naarestong suspek at ang lahat ng nakumpiskang ebidensya sa Tuao Police Station para sa kaukulang dokumentasyon at disposisyon.
Patuloy na pinaiigting ng Cagayano Cops ang kampanya laban sa ilegal na pagmamay-ari at pag-iingat ng mga baril at bala sa pamamagitan ng mas pinaigting na law enforcement operations at pakikipagtulungan ng komunidad upang mapanatili ang kapayapaan, kaayusan, at kaligtasan ng bawat mamamayan sa lalawigan.
Source: Cagayan Police Provincial Office
