Mahigit Php4.5 milyong halaga ng frozen meat na walang kaukulang permit at dokumento ang nasamsam sa isinagawang magkasanib na operasyon ng Police Regional Office 3 (PRO3) at iba’t ibang ahensya ng pamahalaan sa isang processing facility sa Brgy. Calibutbut, Bacolor, Pampanga noong Hunyo 18 hanggang 19, 2026.
Isinagawa ang operasyon matapos makatanggap ng impormasyon ang mga awtoridad na ang naturang establisimyento ay umano’y nag-o-operate nang walang kinakailangang License to Operate mula sa Food and Drug Administration (FDA). Kabilang sa dalawang inaresto ang rehistradong may-ari ng pasilidad at ang production manager nito dahil sa umano’y paglabag sa mga batas sa kaligtasan ng pagkain.
Pinangunahan ang operasyon ng Regional Special Operations Group ng Regional Intelligence Division 3 (RSOG-RID3) sa pakikipag-ugnayan sa FDA Regional Field Office 3, National Meat Inspection Service (NMIS) Region 3, mga tanggapan ng Pamahalaang Bayan ng Bacolor, at Bacolor Municipal Police Station.
Sa isinagawang inspeksyon, natuklasan at nakumpiska ang humigit-kumulang 40 toneladang frozen beef, pork, at chicken products. Ayon sa paunang imbestigasyon, may ilang produkto na umano’y expired na at hinihinalang nire-repack o nire-recycle upang muling maipamahagi sa merkado, na maaaring magdulot ng panganib sa kalusugan ng publiko.
Pansamantalang ipinasara ang pasilidad habang nagpapatuloy ang masusing imbestigasyon ng mga kinauukulang ahensya. Samantala, ang mga naarestong indibidwal at mga nakuhang ebidensya ay nasa kustodiya ng RSOG-RID3 para sa wastong dokumentasyon at kaukulang legal na proseso.
Binigyang-diin ni PBGEN Jess B. Mendez, Regional Director ng PRO3, na mahalaga ang mahigpit na koordinasyon ng mga law enforcement at regulatory agencies upang maprotektahan ang kapakanan ng mamamayan. Aniya, patunay ang matagumpay na operasyong ito sa patuloy na pagsisikap ng PNP na tiyakin na ligtas ang mga produktong pagkain na umaabot sa publiko, alinsunod sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: PRO 3
