Matagumpay na naaresto ng mga awtoridad ang isang lalaking kabilang sa talaan ng mga most wanted person sa lalawigan ng Isabela sa isinagawang operasyon kamakalawa sa Santiago City.
Kinilala ng Santiago City PNP ang nadakip na si alyas “Torio,” 66-anyos at residente ng San Jose, Santiago City, na nakahanay bilang top 6 most wanted person sa buong lalawigan. Ayon sa ulat, matagal nang pinaghahanap ang akusado kaugnay ng mabibigat na kasong kinahaharap nito sa hukuman.
Isinagawa ang pag-aresto ng mga tauhan ng Tracker Team ng Santiago City Police Office Station 3, na pinamumunuan ni PMaj April Iann M. Bumanglag, Station Commander, katuwang ang City Mobile Force Company, City Intelligence Unit SCPO, at Regional Intelligence Unit – 2 Counter-Intelligence Team Santiago. Naaresto ang suspek sa bisa ng warrant of arrest na inilabas ng Regional Trial Court Branch 21 ng Santiago City noong Marso 25, 2024.
Nahaharap ang akusado sa dalawang bilang ng statutory rape, isang bilang ng rape, at paglabag sa R.A. 7610 o ang batas para sa proteksiyon ng mga bata laban sa pang-aabuso. Batay sa utos ng hukuman, walang inirekomendang piyansa para sa pansamantalang paglaya ng akusado habang dinidinig ang mga kaso nito.
Sa pahayag ng Santiago City PNP, patuloy nilang paiigtingin ang kampanya laban sa mga nagtatago sa batas upang mapanatili ang kaayusan at seguridad sa komunidad. Ito ay alinsunod sa adhikain ng kapulisan na “Bagong PNP para sa Bagong Pilipinas: Serbisyong mabilis, tapat, at nararamdaman,” na naglalayong palakasin ang tiwala ng publiko sa hanay ng Philippine National Police.
Source: https://www.philstar.com/pilipino-star-ngayon/probinsiya/2026/05/20/2529202/top-6-most-wanted-ng-isabela-nalambat
