Mandaue City, Cebu – Nakumpiska ang tinatayang Php13,600,000 na halaga ng shabu sa buy-bust operation ng pulisya sa Mandaue City ngayong araw ng Miyerkules, Marso 9, 2022.
Kinilala ni PNP Chief, Police General Dionardo Carlos, ang suspek na si Jorge Paras Phala alyas “Joje”, 52, taxi driver, residente ng Sitio Opra, Barangay Kalunasan, Cebu City at isang drug courier ng local drug group.
Ayon kay Police General Carlos, bandang 5:07 ng umaga nahuli si Phala sa Zone Pechay, Barangay Paknaan, Mandaue City ng mga operatiba ng Police Regional Office 7 at Philippine Drug Enforcement Unit 7.
Ayon pa kay Police General Carlos, nakuha kay Phala ang may kabuuang 2 kilos ng shabu na may Standard Drug Price (SDP) na Php13,600,000, samsung cellphone, buy-bust money at isang Habagat backpack.
Nahaharap ang suspek sa kasong paglabag sa Section 5 at 11, Article II ng RA 9165 o Comprehensive Dangerous Drugs Act of 2002.
Pinupuri ni Police General Carlos ang operating unit para sa matagumpay na buy-bust operation sa Manadaue City.
“Ang sunod-sunod na matagumpay na operasyon ng ating mga operatiba ay isang patunay ng mas pinaigting na kampanya upang tuluyang sugpuin at mahuli na ang mga sindikato ng ilegal na droga sa buong bansa. Ito ay bunga rin ng mas pinalakas na ugnayan at suporta ng ating kapulisan, iba’t ibang sektor ng lipunan at publiko”, ani Police General Carlos.
###
Panulat ni Patrolman Aivan Guisadio
