Bilang bahagi ng paghahanda para sa nalalapit na 2025 National and Local Elections, aktibong nakilahok ang mga tauhan ng Oriental Mindoro Police Provincial Office sa isinagawang Local Absentee Voting (LAV) sa Provincial Headquarters Function Hall sa Barangay Cacawan, Pinamalayan, Oriental Mindoro mula Abril 28 hanggang 30, 2025.
Pinangunahan ni Police Colonel Edison V. Revita, Provincial Director ng OrMin PPO, ang pagboto kasama ang iba pang kwalipikadong pulis na itinalaga sa mga election duties sa mismong araw ng halalan.
Layunin ng LAV na mabigyang-daan ang mga government officials, personnel ng AFP at PNP, at mga miyembro ng media na makaboto para sa mga pambansang posisyon gaya ng mga Senador at Party-List Representatives kahit sila ay naka-duty sa araw ng botohan.
Ang buong proseso ay masusing binantayan at isinagawa sa ilalim ng pangangasiwa ni Ms. Quenelie N. Soller, Election Officer IV at kasalukuyang Municipal Election Officer ng Pinamalayan.
Ang aktibong partisipasyon ng buong hanay ng OrMin PPO sa LAV ay nagpapakita ng mataas na pagpapahalaga ng PNP sa karapatang bumoto ng bawat kasapi nito. Magsilbi rin itong huwarang halimbawa ng balanseng pagtupad sa tungkulin at responsibilidad bilang mamamayan ng bansa.
Sa pamamagitan ng kanilang pagsuporta at pakikilahok sa prosesong elektoral, pinatitibay ng PNP Oriental Mindoro ang kanilang panata na mapanatili ang isang tapat, maayos, at mapayapang halalan sa 2025.
Source: Oriental Mindoro PPO
Panulat ni Patrolwoman Ana Rose D Guadana
