Tinatayang nasa 33,000 tauhan ng Pambansang Pulisya ang boboto sa ilalim ng Local Absentee Voting para sa National and Local Elections 2025 ng Commission on Elections (Comelec) na isinagawa simula April 28 hanggang April 30 sa lahat ng rehiyon sa bansa.
Ayon kay Police General Rommel Francisco D Marbil, PNP Chief, ang pagboto ay karapatan ng bawat Pilipino kabilang na ang ating mga kapulisan.
“We are not just enforcers of democracy — we are part of it. Voting is not only our right; it is our duty, and one way we show our love for our country,” ani Marbil.
Ang Local Absentee Voting ay para lamang sa mga kasapi ng PNP, sundalo, media workers, at iba pang frontline government workers na may trabaho sa araw ng halalan.
Sa kabilang banda, tiniyak naman ni CPNP Marbil ang publiko na handa ang himpilan upang panatilihin ang seguridad at kapayapaan sa lahat ng mga voting precincts. Aniya, mas pinaigting na nila ang checkpoints, chokepoints, at pagpapatrol upang maiwasan ang anumang karahasan, partikular na sa mga election hotspot areas sa buong bansa.
Sa katunayan, may mga tauhan din ang PNP na sumailalim sa pagsasanay kaugnay sa election duties bilang paghahanda sa mga hindi inaasahang insidente.
Samantala, patuloy namang nananawagan ang PNP sa publiko na makiisa at suportahan ang “Kampanya Kontra Bigay” ng Comelec, lalo na sa lahat ng mga botante na maging alerto laban sa vote-buying at vote-selling sa kani-kanilang lokalidad.
