Nakumpiska ng mga awtoridad ang isang hindi lisensyadong baril mula sa isang lalaki sa F. Cabahug Street, Barangay Kasambagan, Cebu City noong Biyernes ng gabi, Enero 17, 2025.
Kinilala ni Police Colonel Enrico E Figueroa, City Director ng Cebu City Police Office, ang suspek na si Jirwel, 39 taong gulang, residente ng Purok Marvest Gold, Sabang, Sibonga, Cebu.
Ayon sa ulat, nagsasagawa ng operasyon ang mga tauhan ng Police Station 4, CCPO bilang bahagi ng kanilang Simultaneous Anti-Criminality Law Enforcement Operations laban sa lahat ng uri ng ilegal na aktibidad nang mahuli ang suspek sa akto na may bitbit na hindi lisensyadong baril.
Nakumpiska mula sa suspek ang isang .38 caliber revolver na walang serial number at dalawang bala.
Nahaharap ang suspek sa kasong paglabag sa Republic Act 10591 o ang “Comprehensive Firearms and Ammunition Regulation Act”, gayundin sa COMELEC Gun Ban na kasalukuyang umiiral.
Patuloy na pinaaalalahanan ng Cebu City Police Office ang publiko na iwasan ang paggamit ng ilegal na armas at makipagtulungan sa mga awtoridad upang mapanatili ang kaayusan at kaligtasan ng komunidad dahil sa Bagong Pilipinas, ang Gusto ng Pulis, Ligtas Ka!
