Tinatayang mahigit Php11.8 milyong halaga ng hinihinalang marijuana bricks ang nasabat ng mga otoridad sa isinagawang anti-criminality checkpoint sa Sitio Bawak, Barangay Malucsad, Pasil, Kalinga noong ika-2 ng Nobyembre 2024.
Ayon kay Police Colonel Gilbert A Fati-ig, Provincial Director ng Kalinga Police Provincial Office, nakatanggap ng tawag mula sa isang nagmamalasakit na mamamayan tungkol sa iniwang itim na sako na naglalaman ng hinihinalang marijuana bricks sa loob ng isang box culvert sa kahabaan ng kalsada kaya agad nagtungo ang pulisya sa lugar.
Naging matagumpay ang nasabing operasyon sa pangunguna ng 2nd Company ng Kalinga Provincial Mobile Force Company katuwang ang Pasil Municipal Police Station, Kalinga Provincial Intelligence Unit/PDEU, at PDEA Kalinga.
Ang operasyon ay nagresulta sa pagkakadiskubre ng hinihinalang marijuana bricks na nakabalot sa transparent na plastic na may tinatayang timbang na humigit-kumulang 99,000 gramo at may Standard Drug Price na Php11,880,000.
Nakumpiska rin ang isang puting PIGROLAC na sako, isang dilaw na sako ng floating feeds para sa adult tilapia, isang dilaw na sako ng floating fish feeds at isang motorcycle cover.
Ang matagumpay na operasyon ng Kalinga PNP ay bilang pagsuporta sa isinusulong ng Pangulong Ferdinand R Marcos Jr., na Whole-of-Nation Approach na kinakailangan para supilin ang paglaganap ng ipinagbabawal na gamot sa ating bansa tungo sa mas mapayapang Bagong Pilipinas.
Panulat ni Patrolwoman Melanie Amoyong
