Ni-raid ng mga tauhan ng National Capital Region Police Office (NCRPO) at Anti-Cyber Crime Group (ACG) ang Century Peak Hotel, isang establisyimento na nauugnay sa mga aktibidad ng Philippine Offshore Gaming Operator (POGO) sa Adriatico Street, Manila noong Huwebes, Oktubre 29, 2024.
Ayon kay Police Major General Sidney S. Hernia, Acting Regional Director ng NCRPO, natuklasan ng mga awtoridad na may nagpapatuloy na POGO operations sa naturang lugar kahit ilang beses na itong nasita.
Isinilbi ng pulisya ang Warrant to Search, Seize, and Examine Computer Data na inisyu ng Regional Trial Court para kumpiskahin at suriin ang mga kagamitan sa hotel.
Layunin ng operasyon na tuluyan nang matigil ang mga ilegal na POGO ayon sa utos ni Pangulong Ferdinand R. Marcos, Jr.
Nadiskubre sa naturang raid ang mga dayuhan ay walang kaukulang permit na patuloy na nagtatrabaho sa gusali.
Nasamsam ng mga operatiba ang iba’t ibang mobile phone, desktop computer, laptop, SIM card, Digital Video Recorder (DVR), at face attendance machine.
Nasa 75 na dayuhang manggagawa mula sa iba’t ibang bansa ang kasalukuyang iniimbestigahan ng Bureau of Immigration (BI).
“Ang NCRPO at ACG ay nakatuon sa pagtiyak na ang mga ilegal na aktibidad ay walang lugar sa ating mga komunidad. Patuloy tayong makikipagtulungan nang malapit sa iba pang ahensya ng gobyerno upang pangalagaan ang kapakanan ng publiko at tiyakin ang Metro Manila ay nananatiling ligtas at legal na kapaligiran,” saad ni PMGen Hernia.
Source: PIO NCRPO
Panulat ni PSSg Remelin M Gargantos
