Isinagawa ng Regional Police Community Affairs and Development Unit (RPCADU) 3 ang Anti-Bullying Lecture sa mga mag-aaral ng San Fernando Elementary School sa Barangay Santo Rosario, City of San Fernando, Pampanga, nito lamang Biyernes, ika-18 ng Oktubre 2024.
Ang naturang lecture ay pinangunahan ni Patrolwoman Lixen Reyz Saweran, Action PNCO, sa ilalim ng pamumuno ni Police Lieutenant Colonel Alex M Apolonio, Officer-In-Charge ng RPCADU 3.
Ang talakayan ay patungkol sa Anti-Bullying, na nakatuon sa pagpapaliwanag tungkol sa bullying—kung ano ito, paano ito nangyayari, at ang mga epekto nito sa mga biktima, mga nanonood, at pati na rin sa mismong nambubully.
Aktibo namang ipinahayag ng mga kabataan ang kanilang mga natutunan na tiyak na magagamit upang maiwasan ang pagiging biktima ng bullying.
Ang aktibidad ay binibigyang-diin ang mahalagang papel ng edukasyon, suporta mula sa pamilya, at mga programa ng komunidad sa pagtulong sa mga kabataan na magkaroon ng mas malalim na pagkaunawa sa isyu ng bullying.
Layunin din nitong maglatag ng mga konkretong solusyon na makakatulong sa pagbuo ng isang mas ligtas, mas maayos na kapaligiran, lalo na sa mga paaralan, upang masiguro ang kaligtasan at kapakanan ng bawat kabataan.
