Nagsagawa ang mga tauhan ng Police Regional Office Cordillera (PRO Cordillera) ng “Trek with a Mission” kung saan naglakad sila ng 8.5 kilometro mula sa Sitio Tanap at nagtapos sa Es-esa Soblino Alodos Elementary School sa Tacadang, Kibungan, Benguet nito lamang ika-22 ng Marso 2024.
Ang aktibidad ay pinangunahan ni Police Brigadier General Patrick Joseph G Allan, ang Deputy Regional Director for Administration; Police Colonel Elmer E Ragay, ang Deputy Regional Director for Operations kasama ang kanilang Regional Advisory Group Police Transformation and Development (RAGPTD).
Aktibo ring lumahok ang Lokal na Pamahalaan ng Benguet, mga tauhan ng National Police Commission, Bureau of Fire Protection, Bureau of Jail Management and Penology at mga civilian outdoor enthusiast.
Ang “Trek with a Mission” ay bahagi ng Project SEMEK (Special Educational Materials through Earnest Kindness) mula sa inisyatibo ng mga miyembro ng RAGPTD at naglalayong makalikom ng pondo para sa pagbili ng mga materyales para sa Es-esa Elementary School at iba pang malalayong paaralan sa loob ng rehiyon upang itaguyod ang edukasyon at pagyamanin ang pag-unlad sa mga komunidad na kulang sa serbisyo habang pinapalakas ang ugnayan sa pagitan ng mga pulis at ng pamayanan.
Tampok din sa aktibidad ang pagsasagawa ng grupo ng medical mission sa Es-Esa S. Alodos Elementary School, Kibungan para sa mga mag-aaral at residente dito kabilang na ang libreng medical check-up, reseta, tulong legal, at pamamahagi ng food packs.
Bukod pa rito, nagsagawa rin sila ng seremonya tungkol sa paraan ng pagtatanim ng punla ng kakaw upang ipakita na ang pagtatanim ng kakaw ay isang sustainable option para sa kabuhayan nila sa nasabing lugar.
Ang Cordillera PNP ay patuloy sa kanilang mga adhikain at adbokasiya na walang pinipiling lugar na tinutulungan malapit man o malayo ay kanilang pinupuntahan maiparating lamang ang magagandang programa ng pamahalaan.
Panulat ni PSSg Lhenee Valerio
