Naga City – Tinatayang Php8,228,000 halaga ng umano’y shabu ang nakumpiska sa tatlong lalaki sa inilunsad na drug buy-bust operation ng pinagsamang mga operatiba ng PNP Bikol sa C5, Barangay Mabolo, Naga City nito lamang Enero 7, 2024.
Kinilala ni Police Colonel Erwin Rebellon, City Director ng Naga City Police Office, ang mga suspek na isang 24-anyos na lalaki, may asawa, businessman (buy and sell); 39-anyos na lalaki, binata, rider; at 22-anyos na lalaki, binata, electronic technician at parehong mga residente ng Lakeside East Banaybayan, Cabuyao, Laguna.
Ayon kay PCol Rebellon, bandang 9:36 ng umaga ng isinagawa ang operasyon ng pinagsanib na mga operatiba ng RPDEU5 Team Albay at Team Naga/ Camarines Sur (lead unit) at Police Station 5-NCPO sa pakikipag-ugnayan sa PDEA-Naga City Office.
Nakumpiska mula sa mga suspek ang 1,210 na gramo ng pinaniniwalaang shabu na may street value na Php8,228,000.
Mahaharap ang mga suspek sa kasong paglabag sa R.A. 9165 o ang Comprehensive Dangerous Drugs Act of 2002.
Ang tagumpay ng PNP Bikol sa pagsugpo ng ilegal na droga ay bunga ng pinaigting na kampanya laban dito upang mahuli ang mga taong nagpapakalat nito para mapanatiling ligtas at maayos ang komunidad.
Source: Naga City Police Office
