Camp Sergio Osmeña, Cebu City – Nakilahok sa isinagawang 3rd Quarter Nationwide Simultaneous Earthquake Drill (NSED) ang Police Regional Office 7 at mga sangay nito na ginanap mula sa kani-kanilang mga opisina at istasyon nito lamang umaga ng Huwebes, ika-08 ng Setyembre, 2022.
Ang aktibidad ay pinangunahan ni Police Brigadier General Roque Eduardo DP Vega, Regional Director; Police Colonel Antonietto Y Cañete, Chief, RCADD at Assistant Division Chief, Police Lieutenant Colonel Mary Crystal B Peralta.
Ang aktibidad ay isinagawa ng mga tanggapan at yunit ng PNP sa buong bansa upang isulong ang kamalayan at kahandaan laban sa lindol.
Patuloy na pinapaalalahanan ng pamunuan ng PRO7 ang kahalagahan ng pagsasagawa ng “duck, cover and hold” sa panahon ng lindol, at manatiling kalmado sa lahat ng oras at magtungo sa isang ligtas o bukas na espasyo sa sandaling huminto ang pagyanig.
Sa panahon ng kalamidad o sakuna, inaatasan din ng pamunuan ng PRO7 na buhayin ang Sub-Committee on Natural Disaster (SCND) at ang Disaster Incident Management Task Group (DIMTG).
Sisiguraduhin ng SCND at DIMTG ang epektibo at mahusay na deployment ng mga kapulisan sa mga apektadong lugar para sa search, rescue at retrieval operations, sa pakikipag-ugnayan sa Regional Disaster Risk Reduction and Management Council (RDRRMC).
Ang naging hakbangin ng Police Regional Office 7 ay naglalayong palawigin ang kaalaman ng mga kawani nito sa tamang pagtugon kapag ang natural na kalamidad tulad ng lindol ang manalasa sa hindi inaasahang panahon.
Patuloy naman na ihahatid ng pamunuan ng PRO7 ang malasakit at pagmamahal para sa kanilang mga nasasakupan.
Panunulat ni Patrolman Aivan Guisadio
