South Cotabato – Timbog ang limang katao matapos mahuli sa akto ng mga otoridad na nagpa-pot session sa isang sementeryo sa Purok 1, Brgy. Poblacion, Carmen, Cotabato gabi ng ng Hunyo 16, 2023.
Kinilala ni Police Lieutenant Colonel Rey Salgado, Hepe ng Carmen Municipal Police Station, ang mga naarestong suspek na sina alyas “Elizalde”, “Boygi”, “Jeffry”, “Ramil”, at si alyas “Kenneth”, pawang nasa hustong gulang at kapwa residente ng nasabing barangay.
Ayon kay PLtCol Salgado, nakatanggap ng impormasyon ang kanilang istasyon mula sa isang concerned citizen na mayroong grupo ng kalalakihan na lumalabag sa curfew hours at kasalukuyang nagpa-pot session sa loob ng nasabing sementeryo na agad naman nagtungo ang kapulisan mula sa Carmen MPS upang kumpirmahin ang nasabing ulat.
Pagdating ng rumespondeng otoridad sa sementeryo, nahuli ang mga suspek na kasalukuyan ngang nagpa-pot session.
Agad silang inaresto at narekober sa kanila ang dalawang pakete ng hinihinalang shabu, kasama ang isang lighter, mga naka-rolyong aluminum foil na ginamit bilang improvised needle at iba pang drug paraphernalia.
Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Samantala, patuloy na paiigtingin ng Carmen PNP ang kampanya laban sa ilegal na droga katuwang ang iba pang ahensya ng gobyerno upang mapanatili ang maayos at ligtas na komunidad.
Dahil rito, hinihimok naman ni PLtCol Salgado ang mamamayan na ireport o isumbong sa pinakamalapit na tanggapan ng pulisya ang mga nangyayaring krimen sa kani-kanilang lugar.
Panulat ni Patrolman Khnerwin Jay A Medelin
