Sampung drug personalities ang naaresto ng Police Regional Office 6 (PRO6) sa siyam na magkakahiwalay na anti-illegal drug operations sa Western Visayas sa loob lamang ng 24 oras. Nasamsam sa mga operasyon ang kabuuang 382.99 gramo ng hinihinalang shabu na may tinatayang Standard Drug Price (SDP) na Php2,604,332 mula alas 6:00 ng umaga noong Nobyembre 6 hanggang alas 5:59 ng umaga noong Nobyembre 7, 2026.
Ang pinakamalaking drug haul ay ang operasyon ng Regional Police Drug Enforcement Unit 6 (RPDEU6) sa Savannah Subdivision, Brgy. Polo Maestra Vita, Oton, Iloilo, dakong alas 2:57 ng hapon noong Nobyembre 6.
Sa naturang buy-bust operation, naaresto ang dalawang Regional Top Priority Targets na kapwa drug personalities, na kinilala sa mga alyas na “Mel,” 54 taong gulang, residente ng Oton, Iloilo, at “Ken,” 45 taong gulang, residente ng Mandurriao, Iloilo City.
Nasamsam mula sa dalawang suspek ang humigit-kumulang 280 gramo ng hinihinalang shabu na nagkakahalaga ng Php1,904,000.
Sa buy-bust operation naman ng City Drug Enforcement Unit (CDEU) ng Iloilo City Police Office (CPO), katuwang ang Iloilo City Police Station 4, naaresto ang isang 44-anyos na e-bike driver na kinilalang HVI at may alyas na “Nonoy,” residente ng Barangay San Juan, Molo dakong alas 8:55 ng gabi noong Nobyembre 6. Nasamsam mula sa suspek ang 60 gramo ng hinihinalang shabu na nagkakahalaga ng PhP408,000.00.
Pinuri ni PBGen Randulf T Tuaño, Regional Director ng PRO6, ang mga operating unit sa kanilang patuloy at magkakaugnay na pagsisikap laban sa ilegal na droga. Binigyang-diin niya na hindi lamang sa dami ng nakumpiskang droga o bilang ng mga naaresto nasusukat ang tagumpay ng kampanya, kundi higit sa lahat, sa kakayahang mapigilan ang paglaganap nito at maprotektahan ang mga pamilya at komunidad laban sa masasamang epekto ng ilegal na droga na bahagi ng malawakang kampanya ng “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
“Sa bawat gramo ng ilegal na droga na napipigilang makarating sa ating mga komunidad, may mga pamilyang napoprotektahan at mga kabataang nailalayo sa panganib. Kaya hindi tayo maaaring maging kampante. Patuloy nating paiigtingin ang ating intelligence-driven operations, palalakasin ang koordinasyon ng ating mga yunit, at tutugisin ang mga nasa likod ng ilegal na kalakalan ng droga. Ang bawat matagumpay na operasyon ay dapat magbunga ng mas ligtas at mas mapayapang pamayanan para sa ating mga kababayan,” pahayag ni PBGen Tuaño.
Muling nanawagan ang PRO6 sa publiko na patuloy na makipagtulungan sa kapulisan sa pamamagitan ng pagbibigay ng tama at mapagkakatiwalaang impormasyon hinggil sa mga kahina-hinalang aktibidad na may kaugnayan sa ilegal na droga sa kanilang mga komunidad.
Source: https://www.facebook.com/share/p/1AJngiPbRq/?mibextid=wwXIfr
