Walang paglabag sa karapatang pantao sa isinagawang operasyon ng pulisya sa Kingdom of Jesus Christ compound sa Davao City, ayon kay Pangulong Marcos kahapon, nang akusahan niya ang mga kritiko na pinupulitika ang pagpapatupad ng arrest warrant laban kay KOJC leader Apollo Quiboloy.
Binatikos ng mga tagasunod ni Quiboloy, na kinasuhan ng sekswal na pang-aabuso at child and qualified human trafficking, ang umano’y labis na paggamit ng puwersa sa pagpapatupad ng Warrant of Arrest laban sa kanilang lider at inakusahan ang mga alagad ng batas ng paglabag sa kanilang mga karapatan.
Ayon sa lokal na pulisya, nag-deploy ang PNP ng mga 2,000 tauhan para ipatupad ang arrest warrant, dahil si Quiboloy umano ay nagtatago sa isang underground bunker na aabot sa 30 metro ang lalim sa loob ng compound.
Sa panayam sa mga reporter sa Malakanyang, pinabulaanan naman ni Pangulong Marcos ang mga pahayag na ang operasyon ng pagpapatupad ng batas sa KOJC compound ay isang overkill at lumabag sa karapatan ng mga miyembro ng grupo.
“Hindi naman siguro… Ang dahilan kung bakit namin ito ginawa ay upang mapanatili namin ang kapayapaan. Ang tanging paraan upang mapanatili ang kapayapaan ay matiyak na ang lugar ay ligtas. At kung isaalang-alang, ito ay isang 30 ektaryang compound, kailangan mo talaga ng maraming mga tauhan. Hindi mo ito magagawa sa isang dosenang tauhan lamang ng pulisya,” ani Pangulong Marcos.
“Pumunta ka sa kahit sinong human rights advocate, wala naman kaming ginawa (na lumabag sa karapatang pantao). Lahat ng pulis na pumasok ay hindi armado. Wala ni isa man sa kanila ang may dala ng baril. Hindi kami gumamit ng tear gas. Wala kaming ginawang ganyan. So anong human rights violation,” dagdag pa Pangulong Marcos.
Source: www.philstar.com
