Maagap na umaksyon at nagbibigay serbisyo publiko ang Valley Cops sa kanilang mga kababayan sa Rehiyon Dos na nasalanta ng bagyong Florita noong Agosto 23, 2022 partikular sa lalawigan ng Cagayan at Isabela.
Ayon kay Regional Director Police Brigadier General Steve B Ludan, naka full-alert status ang buong hanay ng Police Regional Office 2 na handang magserbisyo publiko lalo na sa ganitong panahon ng kalamidad.
Kaya’t kasalukuyan pa lang ang mga malalakas na hangin at buhos ng ulan ay nagsasagawa na ng clearing operation ang mga tauhan ng Baggao Police Station sa daan mula Poblacion hanggang Masical, Baggao, Cagayan.
Samantala, kaparehong operasyon din ang isinagawa ng iba’t ibang Police Station upang tanggalin ang mga punong nakahambalang sa daan.
Gayundin ang patuloy na pagpapatrolya at pagmomonitor sa paglaki ng mga ilog na maaaring magdulot ng baha sa mga mabababang lugar sa kani-kanilang nasasakupan.
Nagsasagawa rin ng Oplan Tambuli ang mga kapulisan upang paalalahanan ang mga residenteng manatili na lamang sa loob ng kanilang mga tahanan.
Maliban sa mga nabanggit, umaksyon din ang mga miyembro ng Valley Cops sa pagtulong sa mga residente at pagsasagawa ng feeding program sa mga evacuation centers.
Ang pambansang Pulisya ay laging handa at alertong maglingkod sa bayan upang mapanatili ang kaligtasan ng mga mamamayan.
Source: Police Regional Office 2; Cagayan PPO; Isabela PPO
###
Panulat ni Police Corporal Carla Mae P Canapi
