Taguig City — Nagsagawa ng Vaccine Fair ang Regional Medical and Dental Unit para sa mga kapulisan ng National Capital Region Police Office na ginanap sa Hinirang Multi-Purpose Hall, Camp Bagong Diwa, Bicutan, Taguig City nito lamang Huwebes, ika-17 ng Nobyembre 2022.
Ang aktibidad ay naisakatuparan sa pamumuno ni PBGen Jonnel Estomo, Acting Regional Director sa pamamagitan ng mga tauhan ng RMDU sa pangunguna naman ni Police Colonel Jessiemyr Protacio, Chief, RMDU-NCR.
Ito ay dinaluhan ni Mrs. Mary Grace Azurin, maybahay ni Chief, PNP PGen Rodolfo S Azurin Jr bilang Guest of Honor and Speaker kasama ang iba pang miyembro ng PNP Officers’ Ladies Club.
Ang naturang programa ay may temang “Basta Bakunado, Kalusugan mo ay sigurado” na nag-alok ng apat na klase ng bakuna kung saan kabilang dito ang COVID-19 (Pfizer) vaccine, Pneumococcal Vaccine, Typhoid Vaccine, at Flu Vaccine na pinilahan ng kapulisan mula sa iba’t ibang distrito ng NCRPO.
Naglalayon ang programang ito ng RMDU na makatulong sa mga kapulisan ng NCRPO upang maprotektahan ang kanilang katawan laban sa anumang sakit nang sa gayo’y magampanan nila ng maayos ang kanilang tungkulin para sa sambayanang Pilipino at makamtan ang isang mapayapang bansa.
Source: PIO NCRPO
Panulat ni PSSg Remelin M Gargantos
