Pinangunahan ng mga tauhan ng Baguio City Police Office ang isinagawang Unity Walk, Interfaith Rally, Integrity Pledge at Covenant Signing para sa mapayapa at patas na National and Local Elections 2025 na ginanap mula sa Upper Session Road hanggang Melvin Jones Grandstand, Baguio City nito lamang ika-26 ng Marso 2025.
Ang kaganapan ay dinaluhan ng mga tauhan ng iba’t ibang hanay ng gobyerno kabilang ang Armed Forces of the Philippines, Commission on Elections, mga lokal na kandidato ng Baguio City, Faith-Based Groups at mga tagasuporta, kung saan pinagtibay ang kanilang pangako sa integridad sa proseso ng nalalapit na halalan 2025.
Bukod pa rito, binigyang-diin ni Police Colonel Ruel D Tagel, City Director ng Baguio City Police Office, ang kahalagahan ng pagkakaisa at paggalang sa pangangalaga sa malaya at patas na halalan habang binigyang-diin ni Atty. Vanessa M Rocal, COMELEC Assistant Regional Election Director, ang Integrity Pledge bilang higit pa sa isang pormalidad kundi isang pangako sa etikal na gawain sa panahon ng kampanya hanggang matapos ang halalan.
Dagdag pa rito, pinaalalahanan ni Atty. Julius D Torres, COMELEC-CAR Regional Election Director, ang mga kalahok na ang halalan ay dapat para sa kapakanan ng publiko, hindi pansariling interes, at nanawagan rin siya sa mga kandidato na itaguyod ang katapatan, pananagutan, at etikal na pamumuno sa buong kampanya.
Samantala, pinangunahan ni Atty. John Paul A. Martin ang panunumpa sa Integrity Pledge, kung saan ang mga kandidato at ang kanilang mga kinatawan ay nanumpa na igalang ang proseso ng elektoral at magsagawa ng patas at mapayapang kampanya, na sinundan ng paglagda sa covenant signing na sumisimbolo sa kanilang pangako sa transparency at good governance.
Ang aktibidad ay isang hakbangin ng Baguio City Police Office at COMELEC-CAR upang matiyak na mapayapa, malinis, at patas ang nalalapit na National at Lokal na Halalan na ang mamamayan ay ligtas at malayang pumili ng kandidatong kanilang gustong iboto.
