Bohol – Arestado ang 33-taong gulang na babae sa Bohol matapos mahulihan ng libo-libong halaga ng ilegal na droga sa inilunsad na buy-bust operation ng mga operatiba ng Candijay Municipal Police Station, Bohol Police Provincial Office (BPPO) noong Martes, Enero 31, 2023.
Kinilala ni Police Major Gerarld Luna, Chief of Police ng Candijay Municipal Police Station, ang suspek na si alyas “Ma. Leslie”, residente ng Brgy. Tabajan, Guindulman, Bohol.
Ayon kay Police Major Luna, nadakip ang suspek dakong alas-11:30 ng gabi sa Barangay Tugas, Candijay ng naturang probinsya na kung saan nakuha mula rito ang nasa halos dalawang gramo ng hinihinalang shabu na may Standard Drug Price na Php13,600, isang unit ng Vivo Cellular Phone, isang color blue coin pouch, at buy-bust money.
Nahaharap ang suspek sa paglabag sa Sec.5 at 11, Art. II ng RA 9165 o ang Comprehensive Dangerous Drugs Act of 2002.
Siniguro naman ni Police Major Luna, na kanilang ipagpapatuloy ang higit na pagpapahusay at pagpapaigting ng bawat hakbangin sa kampanya kontra ilegal na droga maging sa lahat ng uri ng kriminalidad para sa kaayusan at kapayapaan ng komunidad.
