Cebi City – Arestado ang 40-taong gulang na ginang na tulak ng ilegal na droga kasunod ng inilunsad na anti-drug operation ng mga tauhan ng Police Station 3, Cebu City Police Office sa Sitio Sampaguita, Brgy. Tejero, Cebu City noong Linggo, Abril, 23, 2023.
Kinilala ni Police Colonel Ireneo Dalogdog, City Director ng Cebu City Police Office, ang suspek na si alyas “Daya”, residente ng Highway 77 Talamban, Cebu City.
Ayon kay Police Colonel Dalogdog, dakong ala-Una ng madaling araw ng ilunsad ng mga tauhan ng PS 3 ang operasyon na humantong sa pagkakadakip ng suspek at pagkakasamsam ng nasa 420 gramo ng shabu na may halaga na Php2,856,000.
Nakuha pa sa suspek ang isang black case na ginamit bilang lagayan ng droga at ang buy-bust money.
Nahaharap sa kasong paglabag sa Sec. 5 at 11 Art. II ng RA 9165 ang suspek.
Patuloy naman ang buong hanay ng kapulisan ng Cebu City sa pagpapaigting at pagpapahusay ng kanilang mga hakbangin upang sugpuin ang problema sa ilegal na droga.
