Arestado ang Top 9 Most Wanted Person sa City Level sa isinagawang operasyon ng mga awtoridad sa P-A1, Osmeña, Dangcagan, Bukidnon noong Mayo 29, 2025.
Kinilala ang suspek sa alyas na “Amado,” 70 taong gulang, residente ng Barangay Cabuaya, Mati City, Davao Oriental.
Si Amado ay nahaharap sa tatlong bilang ng kasong Rape na may kaugnayan sa Republic Act 7610 o ang “Special Protection of Children Against Abuse, Exploitation and Discrimination Act” na walang inirekomendang piyansa.
Ayon kay Police Major Al Anthony I. Gumban, Officer-In-Charge ng Mati City Police Station, ang pagkakadakip ay resulta ng masusing pagsisiyasat at mahigpit na koordinasyon ng iba’t ibang yunit ng pulisya mula sa Mati City at Bukidnon.
Patuloy na pinapalakas ng pulisya ang mga hakbang upang tiyaking hindi makakatakas sa batas ang mga kriminal at mapanatili ang kapayapaan sa lungsod. Ang tagumpay na ito ay malinaw na mensahe para sa lahat ng kriminal na walang ligtas sa batas, kahit gaano katagal nagtago o kalayo ang kanilang tinutuluyan.
Panulat ni Pat Shairra Rose A Aquino
