Bacolod City – Arestado ang Top 9 at Top 19 Most Wanted Person ng Bacolod City sa magkahiwalay na manhunt operation ng Bacolod City PNP nito lamang Linggo, Mayo 22, 2022.
Ayon kay Police Captain Paul Vincent Pendon, Station Commander ng Bacolod Police Station 2, naunang nahuli ng mga operatiba ng Bacolod Police Station 2 kasama ang Highway Patrol Group at Regional Intelligence Unit, si Hermogenes Gacho, 24, residente ng Purok Kabuhi, Barangay 10 at Top 9 Most Wanted Person sa lungsod, sa kasong paglabag sa R.A. 10883 o New Anti-Carnapping Act of 2016, sa Purok Gracia, Barangay Singcang Airport, Bacolod City.
Samantala, nahuli naman sa Don Salvador Benedicto si Joenard Hemungala, 33, vendor at residente ng Barangay Esteban, Murcia, at Top 19 Most Wanted Person ng Bacolod City sa kasong murder sa tulong naman ng Bacolod City Investigation and Detective Management Unit (CIDMU) at Anti-Kidnapping Group.
Dagdag pa ni Police Captain Pendon, na pinangunahan nila ang operasyon sapagkat nangyari ang dalawang krimen sa loob ng jurisdiction ng Bacolod Police Station 2.
Ang dalawang suspek ay kasalukuyan ng nakakulong sa Bureau of Jail Management and Penology –Taculing.
Ang buong himpilan ng PNP ay hindi tumitigil sa pagpapatupad ng batas at sa pagsasagawa ng mga hakbang sa pagpapanatali ng kaayusan at kapayapaan sa bawat lokalidad na kanilang nasasakupan.
###
