Cebu – Napasakamay ng kapulisan ang tinaguriang Top 5 Provincial Most Wanted Person sa kasong Murder sa operasyon na inilunsad sa Brgy. Prenza, Balamban, Cebu noong Hunyo 20, 2023.
Sa pagtutulungan ng mga operatiba ng Balamban Police Station, Cebu City Mobile Force Company, Criminal Investigation and Detection Group Cebu Field Unit, Cebu Provincial Intelligence Unit at Danao City Police Station nadakip ang akusado pasado ala-1 ng madaling araw noong Martes.
Kinilala ni Police Lieutenant Colonel Glenn Hife, Chief of Police ng Balamban PS, ang naarestong suspek na si alyas “Gadong”, 38, residente ng Brgy. Prenza, Balamban, Cebu.
Inaresto ang akusado sa bisa ng Warrant of Arrest sa krimeng 2 Counts of Murder.
Narekober naman mula sa akusado ang isang unit ng caliber .45 pistol with SN: 350421 na kargado ng anim na live ammunition.
Nakakulong ngayon ang suspek sa Balamban Police Station habang inihahanda ang mga kaukulang dokumento sa mga reklamong kanyang kinakaharap.
Ang pagkakadakip ng personalidad ay bahagi at bunga ng tapat at agresibong pagpapatupad ng kapulisan ng kanilang tungkulin upang tiyakin ang kaayusan at kaligtasan ng komunidad.
