Napasakamay ng awtoridad ang tinuturing na Top 5 Most Wanted Person ng Central Visayas matapos maaresto kasunod ng paghahain ng Warrant of Arrest sa kasong Frustrated Murder sa Faustino Drive, Barangay Mampang, Zamboanga City noong Enero 11, 2023.
Kinilala ni Police Lieutenant Colonel Rolando Barraquio, Force Commander, Lapu-Lapu City Mobile Force Company, ang akusado na si alyas “Waray”, 44, tubong Mampang, Zamboanga City.
Sa pinagsanib na puwersa ng mga tauhan ng Lapu-Lapu CMFC, Sambaoan Municipal Police Station, 701st Maneuver Company at ng Zamboanga City Police Station 7 ay naaresto at naisilbi sa akusado ang warrant dakong alas-8:55 ng gabi.
Tinatayang aabot sa Php200,000 ang rekomendadong piyansa sa kaso ng akusado.
Ang pagkakaaresto ng suspek ay bunga ng matagumpay na kampanya ng pulisya sa pagtugis sa mga taong nagkasala at patuloy na nagtatago sa batas.
