Davao City – Arestado ang isang lalaki sa isinagawang buy-bust operation ng Toril PNP sa Mc Arthur Highway, Brgy. Toril Proper, Toril, Davao City, noong Disyembre 6, 2022.
Kinilala ni Police Major Carol Jabagat, Station Commander ng Toril Police Station, ang suspek na si alyas “Babidi”, 22, residente ng Sitio Duha, Brgy. Daliao, Toril, Davao City na tinaguriang Top 4 High Value Target sa City level.
Ayon kay PMaj Jabagat, naaresto ang suspek sa isinagawang buy-bust operation ng tauhan ng Station Drug Enforcement Unit ng Toril PS katuwang ang PDEA XI.
Dagdag pa ni PMaj Jabagat, nakuha mula sa suspek ang ilang pakete ng hinihinalang shabu na may bigat na humigit kumulang na 6.88 gramo na may street market value na Php96,320 at isang caliber .38 na may kasamang tatlong bala.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Firearms and Ammunition Regulation Act.
Pinuri naman ni PBGen Benjamin Silo Jr., PRO11 Regional Director, ang nasabing operasyon at nagpasalamat sa mga mamamayan sa tulong at tiwala na ibinibigay sa kapulisan upang makamit ang kaayusan at kapayapaan sa lungsod.
Panulat ni Patrolman Alfred Vergara
