Davao del Norte – Arestado ang isang drug personality sa isinagawang buy-bust operation ng PNP at PDEA sa Purok 1, Brgy. Balagunan, Santo Tomas, Davao Del Norte, noong Oktubre 22, 2022.
Kinilala ni Police Major Rodante Varona, Acting Chief of Police ng Santo Tomas Municipal Police Station, ang suspek na si alyas “Bombom”, 42, residente ng nasabing lugar na tinaguriang Top 3 Municipal Drug Personality.
Ayon kay PMaj Varona, naaresto ang suspek sa isinagawang buy-bust operation ng pinagsamang tauhan ng Santo Tomas MPS at Special Drug Enforcement Unit katuwang ang PDEA XI – Davao del Norte.
Dagdag pa ni PMaj Varona, nakuha mula sa suspek ang ilang pakete ng hinihinalang shabu na may bigat na humigit kumulang na 5 gramo at may street market value na Php34,000 at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang pagkakadakip sa suspek ay maglalapit sa layunin ng Police Regional Office 11 na gawing drug-free ang rehiyon onse at sa malasakit na ipinapakita ng kapulisan sa mga mamamayan ay makakamit ang kaayusan at kapayapaan tungo sa kaunlaran ng bansa.
Panulat ni Patrolman Alfred Vergara
