Arestado ang Top 3 Most Wanted Person ng Las Piñas City Police Station at ang Top 4 Most Wanted Person ng National Capital Region Police Office (NCRPO) sa magkahiwalay na operasyon ng pulisya nito lamang Miyerkules, Enero 1, 2025.
Ayon kay Police Brigadier General Anthony Aberin, Acting Regional Director ng NCRPO, naganap ang unang pag-aresto sa tinaguriang Top 4 Most Wanted Person ng NCRPO na kilala bilang si alyas “Adelbert”, bandang 2:30 ng hapon sa kanyang tirahan sa Upper Bicutan, Taguig City.
Ang naturang operasyon ay pinangunahan ng Warrant and Subpoena Unit ng Taguig City Police Station. Si alyas Adelbert, 27 ay wanted para sa maraming kaso, kabilang ang Acts of Lasciviousness at dalawang bilang ng Statutory Rape na walang piyansa.
Ayon pa kay PBGen Aberin, sa ikalawang operasyon naman ay nadakip ang Top 3 Most Wanted Person sa Las Piñas City na kilala bilang si alyas “Richard”, nahuli dakong 4:40 ng hapon sa kanyang tirahan sa Santa Rita Compound, Barangay Talon Uno, Las Piñas City.
Ang pag-aresto ay isinagawa ng Warrant and Subpoena Section ng Las Piñas City Police Station at nahaharap sa kasong Acts of Lasciviousness na may piyansa na Php200,000.
Ang buong pwersa ng NCRPO ay nagpapatupad ng batas upang masiguro ang kaligtasan ng bawat mamayan sa Metro Manila.
Source: PIO NCRPO
