Leyte – Timbog sa isinagawang buy-bust operation ng Leyte PNP ang Top 3 High Value Individual ng Eastern Visayas sa Purok Palay, Brgy. Liberty, Hilongos, Leyte noong Lunes, Hulyo 4, 2022.
Kinilala ni Police Colonel Edwin C Balles, Provincial Director ng Leyte Police Provincial Office, ang nadakip na si John Angelo Baldazo, 19 at nakalista bilang Top 3 HVI sa Regional Level at ang kasama niyang si Jarold Reys Notarte y Lansang, 21 at pawang mga residente ng Hilongos, Leyte.
Ayon kay PCol Balles, naaresto sina Baldazo at Notarte sa pinagsanib na pwersa ng Hilongos Municipal Police Station sa pangunguna ni Police Major Dexter V Edillo, Acting Chief of Police kasama ang Regional Drug Enforcement Unit, Regional Mobile Force Battalion 8 at sa koordinasyon ng Philippine Drug Enforcement Agency 8.
Ayon pa kay PCol Balles, nakabili ang poseur buyer kay Baldazo ng tatlong sachet na naglalaman ng hinihinalang shabu sa halagang Php100,000 na tinatayang may timbang na 80 gramo.
Nakumpiska sa mga suspek ang mga heat-sealed transparent plastic sachet na naglalaman ng shabu, marijuana at mga drug paraphernalia.
Nahaharap ang dalawang suspek sa kasong paglabag sa Sec. 5 at Sec. 11 Art. II ng RA 9165 o mas kilala bilang Comprehensive Dangerous Drugs Act of 2002.
“Pinupuri ko ang sama-samang pagsisikap ng mga operating unit para sa kanilang pag-aresto sa Top 3 Regional High Value Individual. Pinagtitibay nito ang ating pangako na panindigan ang mandato ng PNP sa pagsugpo sa paglaganap ng ilegal na droga sa rehiyon gayundin ang pagkulong sa lahat ng drug personalities. Ito rin ay nagsisilbing babala sa lahat ng indibidwal na sangkot sa illegal drugs, mahahanap namin kayo at hindi namin hahayaang sirain ang kinabukasan ng ating komunidad lalo na ang buhay ng ating mga kabataan”, mensahe ni PCol Balles.
###
Panulat ni Patrolwoman Rialyn B Valdez
