Sta. Teresita, Batangas – Naaresto ang Top 2 Most Wanted Person sa operasyon ng mga pulisya ng Batangas sa kasong panggagahasa nitong Miyerkules, Marso 16, 2022.
Kinilala ni Police Colonel Glicerio Cansilao, Provincial Director ng Batangas Police Provincial Office ang suspek na si Valiente Bathan y Benedicto, 61, residente ng Brgy. Tambo Ibaba, Sta. Teresita, Batangas at dating Overseas Filipino Worker (OFW) na nagtago ng mahigit anim na taon.
Ayon kay Police Colonel Cansilao, bandang 6:20 ng umaga naaresto si Bathan sa Sitio Balagbag, Brgy. Poblacion 1, Sta. Teresita, Batangas ng operatiba ng Sta. Teresita Municipal Police Station.
Ayon pa kay Police Colonel Cansilao, si Bathan ay naaresto sa bisa ng Warrant of Arrest mula sa Regional Trial Court, Fourth Judicial Region, Taal, Batangas na nilagdaan noong Oktubre 8, 2015 na may Criminal Case number 73-2015 sa kasong panggagahasa na walang nirekomendang piyansa.
Samantala, hinimok ni Police Colonel Cansilao ang mga mamamayan na mag-ingat at pangalagaan ang mga kababaihan laban sa mga sekswal na pang-aabuso.
Dagdag pa nya, makiisa ang mamamayan sa pulisya sa paghuli sa mga wanted person para pagbayaran ang kasalanan at mabigyan ng hustisya ang mga naging biktima nito.
###
Police Executive Master Sergeant Joe Peter V Cabugon
