Arestado ang isang suspek na itinuturing na Top 10 High Value Individual (HVI) sa lungsod matapos ang matagumpay na buy-bust operation na isinagawa ng mga operatiba ng Ma-a Police Station dakong 4:05 ng hapon noong Hunyo 8, 2025, sa Purok 17, Datu Loho, Barangay Ma-a, Davao City.
Pinangunahan ang operasyon ni Police Lieutenant Frederick P Hapitan sa ilalim ng direktang superbisyon ni Police Major Philip Dave A Uddin, Officer-in-Charge.
Kinilala ang suspek na si alyas “Egie”, 24 anyos, binata, isang construction worker at residente ng Purok 2, Uguis, Eden, Toril District, Davao City.
Sa isinagawang operasyon, nakumpiska mula sa suspek ang tinatayang 6 gramo ng hinihinalang shabu na may halagang Php48,000, buy-bust money, isang pitaka, National I.D., at isang cellphone na umano’y ginamit sa iligal na transaksyon.
Nahaharap ang suspek sa kasong paglabag sa Sections 5 at 11 ng Republic Act 9165 o ang “Comprehensive Dangerous Drugs Act of 2002”.
Ang matagumpay na operasyon na ito ay patunay ng patuloy na determinasyon ng mga otoridad sa pagsugpo sa ilegal na droga sa lungsod. Nanawagan ang kapulisan sa publiko na makiisa sa kampanya kontra-droga sa pamamagitan ng agarang pag-uulat ng kahina-hinalang aktibidad sa kanilang komunidad. Sama-sama, mas mapapalakas natin ang laban para sa isang mas ligtas at mas maayos na Davao.
Panulat ni Pat Shairra Rose A Aquino
