Antique – Arestado ang Top 1 Most Wanted Person sa Western Visayas ng mga tauhan ng Culasi Municipal Police Station sa Brgy. Centro Poblacion Culasi, Antique pasado alas-sais ng umaga ng Biyernes nitong ika-3 ng Marso 2023.
Kinilala ni Police Major Mona Guia Menez, Hepe ng Culasi Municipal Police Station, ang akusado na si alyas Ben na residente ng Barangay Batbatan Culasi, Antique at naitala bilang Top 1 Most Wanted Person sa Regional Level, Provincial Level at Municipal Level.
Ayon kay PMaj Menez, ang suspek ay nasakote ng trackers team ng Culasi Municipal Police Station kasama ang mga operatiba ng Regional Intelligence Division (RID), PRO6, PIT Antique RIU6, PIU Antique PPO at ng Antique MARPSTA.
Ang suspek ay mayroong tatlong standing Warrant of Arrest para sa kasong Rape sa ilalim ng Art. 266 para 1 ng RPC na walang inirekomendang piyansa.
Ang PRO6 sa ilalim ng pamumuno ni PBGen Leo Francisco ay magpapatuloy sa mas pinaigting na kampanya laban sa mga wanted persons ng rehiyon upang sila ay mahuli at mapanagot sa kanilang krimeng nagawa.
