Taguig City — Arestado ang lalaking tindero matapos mamataan ng mga operatiba ng Taguig City Police Station ang isang 38 caliber revolver na nakasukbit sa kanyang baywang nito lamang Miyerkules ng gabi, Mayo 11, 2022.
Kinilala ni Police Brigadier General Jimili Macaraeg, District Director ng Southern Police District ang suspek na si Edwin Molato y Caduyac, 37, residente ng Taguig City.
Ayon kay PBGen Macaraeg, bandang 8:30 ng gabi nang aktong nakita ng mga otoridad ang nasabing baril sa suspek sa kahabaan ng Callao St., Brgy. South Signal Village, Taguig City habang sila’y nagsasagawa ng anti-criminality operation.
Ang naturang baril ay may serial number na 5213 at kargado ng apat na live ammunition.
Bigo si Molato na magpakita ng mga kaukulang dokumento dahilan upang siya ay damputin ng pulisya.
Ang suspek ay mahaharap sa kasong paglabag sa Omnibus Election Code (Gun Ban) at RA 10591 o Comprehensive Firearms and Ammunition Regulation Act.
“Ako’y nananawagan sa ating mga kababayan na isuko sa otoridad ang inyong undocumented firearms habang hindi pa tuluyang naayos ang kaukulang papeles nito, mahigpit po ang aming pagbabantay at pagpapatupad ng ating gun ban dito sa ating nasasakupan, at kaliwa’t kanan po ang aming operasyon laban sa mga ito upang hindi na magamit sa anumang krimen,” dagdag ni PBGen Macaraeg.
Source: SPD PIO
###
PCpl Jhoanna Marie Najera-Delos Santos
