Iloilo City – Naaresto ang isang taxi driver na tulak ng droga sa buy-bust operation ng Iloilo City Police Station 3, Drug Enforcement Team sa Barangay Balabago, Jaro, Iloilo City nito lamang Lunes, ika-27 ng Hunyo 2022.
Kinilala ni Police Captain Eduardo Siacon Jr, Station Commander ng Iloilo City Police Station 3, ang suspek na si Felix Enore y Las, alyas “Utak”, 43, residente ng Brgy. Cato-ogan, Pototan, Iloilo.
Ayon kay PCpt Siacon Jr, naaresto ang suspek matapos magbenta sa isang pulis posuer-buyer ng isang sachet ng hinihinalang shabu na nagkakahalaga ng Php1,100.
Ayon pa kay PCpt Siacon Jr, nakumpiska mula sa suspek ang anim na piraso ng plastic sachet na naglalaman ng hinihinalang shabu na may timbang na 31.4 gramo at nagkakahalaga ng Php213,520, isang unit na blue Oppo mobile phone, isang wallet na color brown na naglalaman ng cash money na Php700 kasama ang iba pang mga dokumento at isang unit na Toyota Avanza.
Nahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Sinisiguro ng Iloilo Police Provincial Office na paiigtingin ang operasyon nito upang agad na mahuli ang mga may pananagutan sa batas at masawata ang mga taong nagbebenta ng ipinagbabawal na gamot.
###
