Aklan – Arestado sa inilunsad na pagsisilbi ng Warrant of Arrest ang tatlong magkakapatid na itinuturing na mga Regional Most Wanted Person sa kasong Murder sa magkahiwalay na operasyon sa bayan ng Banga at Balete, Aklan nitong ika-20 ng Hulyo 2023.
Kinilala ni Police Colonel Victorino Romanillos Jr., Provincial Director ng Aklan Police Provincial Office, ang magkakapatid na wanted person na sina Welan, 22; Wilmar, 30; at Wennie, 25, pawang mga residente sa bayan ng Balete sa Aklan.
Si Wilmar ay naaresto sa Banga, Aklan ng pinagsanib na pwersa ng CIDG Aklan PFU, RIU6-PIT Aklan, 1st Aklan PMFC, Naval Forces Central, AVSEGROUP Kalibo, Aklan at Aklan PHPT.
Samantala, si Welan ay naaresto naman sa bayan ng Balete ng pinagsamang mga tauhan ng 1st Aklan PMFC, CIDG, Tracker Team Aklan PPO, PIU Aklan, Altavas MPS, PHPT Aklan, Naval Forces Central, at RUI6 PIT Aklan habang si Wennie naman ay naaresto sa parehong bayan ng mga tauhan ng Balete Municipal Police Station, Tracker Team ng Aklan CIDG, at ng PNP Aviation Security Group.
Ang matagumpay na pagkakadakip sa mga akusado ay patunay ng isang mahusay at walang humpay na kampanya ng kapulisan laban sa lahat ng uri ng kriminalidad upang mapanatili ang kaligtasan ng mga mamamayan.
