Arestado ang tatlong lalaki sa isinagawang buy-bust operation ng mga awtoridad sa Barangay San Mariano, Roxas, Oriental Mindoro, nitong ika-28 ng Abril 2025.
Kinilala ang mga naarestong personalidad na sina alyas “Freddie”, 54 taong gulang, at walang trabaho; alyas “Nelson”, 52 taong gulang, kapwa residente ng Barangay San Mariano, Roxas, Oriental Mindoro; at alyas “Ryan”, 27 taong gulang at residente ng Barangay Bagumbayan, Roxas, Oriental Mindoro.
Ang operasyon ay pinangunahan ng PDEA Oriental Mindoro Provincial Office, kasama ang PDEA Calapan SIU, Roxas MPS-MDET, RDEU, PDEU, PDEG, at NBI MIMAROPA.
Nakumpiska mula sa mga naarestong suspek ang tatlong heat-sealed transparent plastic sachet na naglalaman ng hinihinalang shabu na tumitimbang ng humigit-kumulang limang (5) gramo at ilang drug paraphernalia.
Ang mga naarestong suspek ay mahaharap sa kasong paglabag sa Article II ng Republic Act 9165 na kilala rin bilang “Comprehensive Dangerous Drugs Act of 2002”.
Ang kapulisan ay patuloy sa pagpapaigting ng kanilang kampanya kontra iligal na droga. Ito ay alinsunod sa isa sa pangunahing prayoridad ng administrasyon na labanan ang mga sindikato ng droga sa pamamagitan ng pagpigil sa kanilang mga iligal na aktibidad at pagbuwag sa kanilang mga operasyon.
Source: PDEA Regional Office MIMAROPA
Panulat ni Patrolwoman Ana Rose D Guadana
