Talibon, Bohol – Matagumpay na naidaos ang Kick-off Ceremony ng Brigada Eskwela na nilahukan ng mga miyembro ng Talibon Municipal Police Station sa Barangay San Jose, Talibon, Bohol nito lamang ika -1 ng Agosto 2022.
Pinangunahan ng School Principal ng San Jose High School na si Marcela Bautista, at masugid din namang dinaluhan ng Mayor ng nasabing munisipalidad na si Hon. Janette A. Garcia, kasama ang mga guro, magulang at iba’t ibang ahensya ng pamahalaan kabilang na ang BFP.
Ang nasabing programa ay alinsunod sa paghahanda ng lahat ng paaralan at mga mag-aaral sa pakikipagtulungan ng mga magulang para sa ganap na pagpapatuloy ng face-to-face classes sa Agosto 22, 2022.
Bilang bahagi ng programa, pinangunahan ng Kapulisan ng Talibon ang pagpapaganda sa nasabing paaralan kasama ang mga school head, guro, magulang at iba pang personalidad.
Ito rin ay ang pagsisimula ng isang mapaghamong gawain upang tuluyang maayos at malinis ang iba’t ibang paaralan sa Talibon sa mga susunod pang mga araw.
Hindi lingid sa ating kaalaman na ang paaralan ay maituturing na pangalawang tahanan ng mga mag-aaral, kaya naman ang Pambansang Pulisya katuwang ang iba’t ibang grupo at ahensya ay nakatuon sa pagpapanatili ng isang ligtas at malinis na institusyon upang matulungan ang mga mag-aaral at mga guro na magkaroon ng kumportable at kaaya-ayang paaralan.
###
Panulat ni Patrolwoman Kyla Hannah R Evangelista
