Sa isang simple ngunit makahulugang pagtitipon, ipinagdiwang ng Police Regional Office 2, ang matagumpay at mapayapang pagdaraos ng National and Local Elections 2025 na ginanap sa Covered Court, Camp Marcelo A Adduru, Tuguegarao City, Cagayan nito lamang ika-20 ng Mayo 2025.
Ang aktibidad ay pinangunahan ni Police Brigadier General Antonio P. Marallag, Jr., Regional Director ng PRO2, kasama ang Philippine Army, Philippine Coast Guard, Bureau of Fire Protection, Philippine Marines, at Commission on Elections (COMELEC).
Ipinahayag ni Region 2 COMELEC Director, Atty. Ederlino U. Tabilas, ang kanyang taos-pusong pasasalamat sa lahat ng kawani ng nasabing mga ahensya sa seguridad at kaayusan ng halalan. Aniya, “Kami ang utak, ngunit kayo ang tagapagpatupad,” at binigyang-diin niya ang mahabang paghahanda ay naging susi sa tagumpay ng eleksyon.
Ayon naman kay PBGen Marallag, Jr., ang tagumpay ng eleksyon ay patunay ng katatagan at dedikasyon ng mga naglilingkod. Sa kabila ng pagod, distansya, at hirap ng trabaho, ipinakita ng mga miyembro ng PRO2 at nasabing ahensya ang kanilang tapang at integridad mula paghahanda hanggang sa aktwal na araw ng halalan.
Kahit may mga insidenteng naitala, nanatiling maayos ang kabuuang proseso ng halalan sa tulong ng matibay na koordinasyon sa pagitan ng mga ahensya ng gobyerno—COMELEC, AFP, Coast Guard, BFP, Marines, at mga lokal na pamahalaan.
Nagpasalamat din si PBGen Marallag, Jr., sa suporta ng publiko at sa pakikiisa ng bawat mamamayan sa rehiyon dos. Aniya, ang tagumpay ng eleksyon ay hindi lang sukatan ng kaayusan at katahimikan, kundi patunay ng pagkakaisa at tapat na serbisyo ng mga tagapangalaga ng komunidad. Nangako rin siyang magpapatuloy ang paglilingkod ng kapulisan na may tapat, propesyonalismo, at walang pinapanigan para sa demokrasya at kapakanan ng sambayanan.
Source: Police Regional Office 2
Panulat ni Patrolman Erwin Calaus
