Boluntaryong sumuko sa Buguey Police Station ang isang (1) tagasuporta at kontak umano ng Communist Terrorist Group (CTG) kahapon, Nobyembre 4.
Kinilala ang sumuko na si alyas “Omping”, 41 taong gulang, may asawa, isang magsasaka at residente ng Barangay Villa Cielo, Buguey, Cagayan.
Isiniwalat ni alyas “Omping” na noong huling tatlong buwan ng taong 2020 ay madalas na bumisita ang teroristang grupo sa kanyang kubo sa Sitio Birao, Barangay Villa Cielo, Buguey upang magpahinga ngunit hindi naman umano nagtatagal.
Kalaunan ay nagtagumpay ang grupo na paniwalain siya sa kanilang mga maling ideolohiya at nagsilbi siya bilang “spy” ng mga pulis at militar.
Inihayag din ni alyas “Omping” na binibigyan siya ng pera para ipagbili sila ng suplay na pagkain at sigarilyo ng mga rebelde.
Matapos niyang malaman ang boluntaryong pagsuko ng kanyang mga kasamahan sa mga awtoridad, ay nagpasya rin siyang putulin ang kanyang ugnayan sa teroristang grupo.
Sa kasalukuyan, si alyas “Omping” ay sumasailalim sa custodial debriefing at tactical interrogation sa Buguey Police Station.
###
Panulat ni: Police Corporal Josephine T Blanche
