Sagay City, Negros Occidental– Kalaboso ang isang lalake na pinaghihinalaang rapist sa Sagay City, Negros Occidental nitong Lunes, Mayo 17, 2022.
Kinilala ni Police Lieutenant Colonel Jonel Guadalupe, Hepe ng Sagay City Police Station, ang suspek na si George Martinez, 18, residente ng Purok Laroca, Barangay Vito, Sagay City.
Ayon kay Police Lieutenant Colonel Guadalupe, madaling araw ng Lunes, Mayo 16, 2022, nang pumasok si Martinez sa isang bahay sa Fortuneville Subdivision, Brgy. Rizal, Sagay City at akmang gagahasain ang isang babaeng biktima.
Nanlaban ang babae kasama ang anak nito kaya naitulak ang suspek palabas at agad na inilock ang pinto.
Agad namang inireport ng anak ng babae ang naturang insidente sa Sagay CPS at nagresulta sa pagkaaresto ng suspek.
Dagdag pa ni PLtCol Guadalupe, si Martinez din ang suspek sa akmang panggagahasa sa isang menor de edad sa parehong lungsod nitong Mayo 11, 2022.
Nahaharap ang suspek sa kasong Attempted Rape at Unjust Vexation in relation to R.A. 7610.
Samantala, hinimok naman ng Sagay PNP ang publiko na ireport agad sa mga otoridad sakaling may naaktuhan na parehong pangyayari o pinaghihinalang mga personalidad upang maiwasan ang ganitong uri ng krimen sa nasabing lungsod.
###
