Ang paghayag ng suporta ni Pangulong Ferdinand Marcos Jr. sa pag-aresto sa televangelist na si Apollo Quiboloy ay nagpataas ng moral ng puwersa ng pulisya na ipagpatuloy ang kasalukuyang operasyong pagsisilbi ng warrants of arrest sa KOJC Compound sa Davao City.
Ayon kay Police Brigadier General Roderick Alba, ang tagapagsalita ng Special Task Force Teknon Alpha, ang kumpiyansa ni Marcos sa kanilang operasyon ay nagpapanatili ng kanilang moral sa kabila ng pag-alma ng mga miyembro ng KOJC sa ikaaaresto ng kanilang lider na si Quiboloy.
“Talagang nagpapasalamat kami sa Pangulo sa kanyang pagtitiwala sa ginagawa ng ating PNP… Yung aming morale, aming spirit, despite… medyo napatagal kami kaunti because of the challenges imposed mismo ng mga supporters,” ani PBGen Alba sa isang interview noong ika-28 ng Agosto 2024.
Sa isang interbyu kay Pangulong Marcos kamakailan lang, nabanggit din niya ang dahilan kung bakit ganoon na lang ang bilang ng mga pulis sa nasabing lugar.
“The reason within this was so that we could maintain peace. The only way to maintain peace is to make sure that the area is safe and secure. And considering that this is a 30-hectare compound, kailangan mo talaga ng maraming tao. Hindi mo pwedeng gawin ito na isang dosenang pulis. Para lang sa pag-inspeksyon ng 30 hectares ay kailangan mo agad ng maraming tao,” pahayag ni Pangulong Marcos.
Nauna nang hinimok ni Pangulong Ferdinand Marcos Jr. si Quiboloy na harapin ang mga kasong isinampa laban sa kanya, sinabing sumusunod lamang ang gobyerno sa batas sa pag-uutos sa kanya ng pag-aresto.
Source: Inquirer.net
