Nakiisa ang mga tauhan ng Sta. Monica Municipal Police Station sa isinagawang Unity Walk, Interfaith Prayer, at Covenant Signing na ginanap sa Sta. Monica Municipal Building, Purok 4, Barangay T. Arlan, Sta. Monica, Surigao Del Norte noong Pebrero 8, 2025.
Pinangunahan ni Police Captain Ariel E. Esperon, Officer-in-Charge ng Sta. Monica Municipal Police Station, ang aktibidad na dinaluhan ng mga kinatawan mula sa Commission on Elections (COMELEC), Department of the Interior and Local Government (DILG), Armed Forces of the Philippines (AFP), Philippine Coast Guard (PCG), Bureau of Fire Protection (BFP), Department of Education (DepEd), mga pinuno ng relihiyon, mga kandidato sa pulitika, mga lider ng grupong pang-adbokasiya, at iba pang kawani ng pamahalaan.
Nagsimula ang programa bandang 5:00 ng umaga sa isang panalangin ng iba’t ibang pananampalataya, sinundan ng Unity Walk, at natapos sa Peace Covenant Signing, kung saan pormal na nangako ang mga kandidato na magiging tapat at responsable sa kanilang pangangampanya.
Ang Unity Walk ay bahagi ng isang mas malawak na pambansang kampanya na naglalayong tiyakin na ang Halalan 2025 ay magiging mapayapa, maayos, at patas.
Layunin ng aktibidad na ito ay pagsamahin ang mga kandidato, ahensya ng gobyerno, at iba pang sektor upang ipakita ang kanilang pangako na sundin ang tamang proseso ng eleksyon, iwasan ang karahasan, at panatilihin ang kapayapaan tungo sa Makabagong Halalan para sa Makabagong Pilipino 2025.
Panulat ni Pat Karen Mallillin
