Tangub City, Misamis Occidental (December 22, 2021) – Bumuo ng Special Investigation Task Group Oaminal Gutierrez Almonte ang Police Regional Office 10 (PRO 10) upang tutukan ang imbestigasyon sa pamamaril sa dalawang (2) kilalang politiko ng Misamis Occidental sa Tangub City noong Miyerkules ng gabi, Disyembre 22, 2021.
Lumalabas sa inisyal na imbestigasyon ng pulisya na ang pag-atake ay ginawa ng isang sniper na tumama kay Lopez Jaena Mayor at Vice-Governor bet Michael Gutierrez na agad na isinugod sa intensive care unit ng isang ospital sa Ozamiz City ngunit namatay rin noong Disyembre 27, 2021 sa isang ospital sa Maynila. Ihahatid sa huling himlayan si Mayor Gutierrez sa Enero 4, 2022.
Isinugod rin ang dating Alkalde ng Oroquieta City at 1st District congressional aspirant na si Jason Almonte dahil sa natamong daplis ng bala sa ulo. Si Deputy Speaker at Governor bet Henry Oaminal ay bahagyang nasugatan rin sa pamamaril.
Nananawagan si Police Brigadier General Benjamin Acorda Jr., Regional Director ng Police Regional Office 10 sa mga taong may impormasyon ukol sa insidente na makipagtulungan sa pulisya upang madakip ang may sala at agarang malutas ang kaso.
######
Panulat ni: Patrolman Edwin B Baris
