Camp Tirso H Gador, Tuguegarao City — Isinagawa ang sabay-sabay na ceremonial ribbon cutting ng mga bagong disenyo ng Project P.O.S.T.E ng Cagayan Police Provincial Office sa iba’t ibang bayan sa lalawigan noong ika-16 ng Agosto taong kasalukuyan.
Ayon kay Police Colonel Renell R Sabaldica, Provincial Director ng Cagayan PPO ang Project P.O.S.T.E. o Police Outpost on the Street for Traffic direction, control and quick Emergency ay naglalayong mapabilis ang pagresponde ng mga kapulisan sa mga insidente o krimen sa kalye.
Napapalakas din ng proyekto ang pagpapatupad sa mga ordinansa ng mga munisipalidad ng Cagayan at agarang pagtugon sa anumang pangangailangan o katanungan ng publiko hinggil sa pagpapanatili ng kaayusan at kapayapaan sa lugar.
Samantala, ang isinagawang ribbon cutting ng Project P.O.S.T.E. ng Tuguegarao City Police Station ay pinangunahan ni PCol Sabaldica at dinaluhan ni City Mayor Hon. Maila Ting-Que na ginanap sa SM Downtown Tuguegarao City, Cagayan.
Maging sa ibang bayan ng Cagayan ay aktibong lumahok ang kani-kanilang Local Chief Executives at stakeholders bilang pagpapakita ng kanilang pagsuporta sa mga proyekto ng kapulisan.
Ang Pambansang Pulisya ay magpapatuloy sa pagpapaigting ng police visibility upang mapigil at maiwasan ang paglaganap ng mga krimen sa komunidad.
Source: Cagayan Police Provincial Office
###
Panulat ni Police Corporal Carla Mae P Canapi
